அணிபட்டு அணுகி – பழனி திருப்புகழ்

வணக்கம் நண்பர்களே!

murugan-acrylic-table-stand-BS88_lஇனிய பொங்கல் திருநாள் மற்றும் தமிழ்ப் புத்தாண்டு நல்வாழ்த்துகள்.

நண்பர் ரவிக்குமார் கேட்டுக்கிட்டதால இன்னொரு திருப்புகழுக்கு விளக்கம் எழுதுறேன். வழக்கம் போல எளிய நேரடியான விளக்கந்தான். தூண்டி விட்ட நண்பருக்கு நன்றி. குற்றங்குறை இருந்தா முருகனே பொறுப்பு.

அணிபட்டு அணுகின்னு தொடங்குற திருப்புகழ் பழனிக்கான திருப்புகழ். நம்ம செய்ற எதாவது குற்றத்துல இருந்து தடுத்துக் காப்பாத்தச் சொல்லுற மாதிரிதான் திருப்புகழ் பாட்டுகள் இருக்கும்.

இந்தப் பாட்டில் காமத்தால் செய்யும் தவறுகள்ள இருந்து காப்பாத்தச் சொல்லி முருகனை வேண்டுறாரு அருணகிரி.

காமம் தப்பா? காமம் கூடாதுன்னா மனித இனமே இல்லாமப் போகுமே!

அருணகிரி சொல்ல வர்ரது கூடாத காமம். தவறான வழியில போற காமம் தவறான முடிவைத் தரும்.

ஒவ்வொரு நாளும் கேள்விப்படுறோமே… காதலனோடு சேந்து கணவனைக் கொன்ற மனைவி. மனைவியைக் கொன்ற கணவன். ஆகக்கூடி கூடாத காமம் மரணத்தையே கொண்டு வர்ரதுக்கான வாய்ப்பிருக்கு.

இதத்தான் அருணகிரி இந்தப் பாட்டுல கோடிட்டுக் காட்டுறாரு.

அணிபட்டு அணுகித் திணிபட்ட மனத்தவர் விட்ட விழிக் கணையாலும்
சரியான முறையில் பதம் பிரிச்சா நமக்குப் பொருள் எளிமையாப் புரிஞ்சிரும். அணின்னா வரிசை. அணியணியாகச் சென்றனர்னு செய்திகள்ள படிக்கிறோமே. அப்படி அணி அணியா.. அதாவது வரிசையா நிக்கும் திணிபட்ட மனத்தவர். திணிபட்ட மனம்னா கல் நெஞ்சம்.

அருணகிரி தன்னோட வாழ்க்கைல இருந்தே அடுத்தவங்களுக்குப் பாடம் சொல்றாரு. வசதியான வீட்டுல பொறந்து செல்லமா வளந்து இருந்த காசெல்லாம் திருவண்ணாமலை தாசிகள் கிட்ட இழந்தாரு. அந்தத் தாசிகளைத்தான் அணிபட்டு அணுகித் திணிபட்ட மனத்தவர்னு சொல்றாரு. வரிசையா நின்னு “என்னைப் பார் என் அழகைப் பார்”னு கொஞ்சம் கூட இரக்கமே இல்லாம கண்ணால அம்பு விட்டு அழைக்கிறாங்களாம்.

அரி சுற்று கழைத் தவர் பெற்ற வளத்தவன் விட்ட மலர்க் கணையாலும்
அந்த தாசிப் பெண்கள் பார்த்ததால மட்டும் ஒன்னும் நடந்துறாது. அவங்க விழியம்பு விட்ட நேரத்துல மன்மதனும் நம்ம மனசுக்குள்ள மலரம்பு விட்டாத்தான் ஆசை பிறக்கும்.

அரின்னா வண்டு. கழைன்னா கரும்பு. தவர்னா வில். அரி சுற்று கழைத் தவர்னா வண்டுகள் சுற்றுகின்ற கரும்புவில். அந்தக் கரும்புவில்லைப் பெற்ற வளமையான மன்மதன் விட்ட மலர்க்கணை.

பிணிபட்டு உணர்வற்று அவமுற்று இயமற் பெறும் அக்குணமுற்று உயிர் மாளும்
தவறான வழியில் உறவுக்கு அழைக்கும் பெண்கள் பார்த்து அழைக்கும் போது மன்மதனும் அம்பு விட்டா என்னாகும்?

பிணி பட்டு – மனதில் கூடாக் காமநோய் வரும்
உணர்வற்று – மத்த எல்லா உணர்வுகளும் மறந்து போய் அது மட்டுமே இருக்கும்
அவமுற்று – அவம்னா கேடு. கேடு விளையும்

சரி. இதெல்லாம் நடந்தா என்னாகும்?

தீய குணங்கள் பெருகும். தீய குணங்கள் எங்க பெருகுதோ அங்க இயமன் வருவான். இயமன் வந்தா உயிர் போகும். அதுதான் இயமன் பெறும் அக்குணமுற்று உயிர் மாளும்.

அப்ப என்னதான் செய்றது? அதுதான் அடுத்த வரி.

பிறவிக்கடல் விட்டு உயர் நற்கதியைப் பெறுதற்கு அருளைத் தரவேணும்
இது படிச்சதும் புரியும் எளிமையான வரி. இந்தப் பிறவிங்குற கடலை விட்டுட்டு இறைவன் திருவடியில் நற்கதி கிடைக்கிறதுக்கு நமக்கு என்ன அருள் வேணுமோ… அந்த அருளை முருகன் கொடுக்கனும்னு கேக்குறாரு அருணகிரி.

இந்த வரியில் முருகன்னே வரலையே. அப்புறம் எப்படி முருகனைத்தான் அருணகிரி கேக்குறார்னு சொல்றது? அதுக்குதான் அடுத்த பாதிப் பாட்டு. முருகன்னு இந்த வரியில் சொல்லாம விட்டத அடுத்த பாதிப் பாட்டு முழுக்கச் சொல்றாரு.

கணி நற்சொருபத்தை எடுத்து மலைக்கனியைக் கணியுற்றிடுவோனே
கணின்னா வேங்கைமரம். வள்ளியைக் காதலிக்க வந்தப்போ வேங்கை மரமா மாறி நின்னாராம் முருகன். அப்படியெல்லாம் நல்ல நல்ல வடிவங்களை எடுத்து மலைக்கனியாகிய வள்ளியைக் காதலிச்சவனே கைப்பிடிச்சவனே முருகா!

கமலத்து அயனைப் பிரணவத்து உரையைக் கருதிச் சிறை வைத்திடுவோனே
இதுவும் எளிமையாப் புரிஞ்சிருக்கும். தாமரை மலரில் இருக்கும் அயனுக்குப்(நான்முகன்) பிரணவ மந்திரத்தின் பொருள் தெரியாததால் சிறையில் இட்டவனே முருகா!

பணியப்பணியப் பரமர் பரவ பரிவுற்று ஒரு சொற் பகர்வோனே
பணியப்பணியப் பரமர் = பணி + அப்பு + அணி + அப் + பரமர்
பணி – பாம்பு
அப்பு – நீர் (கங்கையைச் சொல்றாரு இங்க)
அணி – அணிந்துள்ள
அப் பரமர் – அந்தப் பரமசிவன்

திருவிளையாடல் படத்துல ஞானப்பழத்தைப் பிழிந்து பாட்டுல “நல்ல குருநாதன் உனக்கென்ன விதம் இக்கனியை நாமீவது என்று நாணித்தான் அப்பணித்தலையர் தரவில்லை ஆதலால்”னு கண்ணதாசன் எழுதியிருக்காரு.

இதை ரொம்பப் பேரு அப்பனித்தலையர்னு நெனைச்சிக்கிட்டிருக்காங்க. சிவன் கைலாயத்துல இருக்காரு. அங்க ரொம்பப் பனி. அது அவர் தலைல இருக்கு. அதுனால அப்பனித்தலையர் சரிதான்னு ஒரு விளக்கம் வேற.

ஆனா அதல்ல பொருள். பணின்னா பாம்பு. அப்பணித்தலையர்னா தலையில் பாம்பைச் சூடியவர்னு பொருள்.

பணியப்பணியப் பரமர் பரவ – தலையில் பாம்பையும் கங்கையையும் அணிந்திருக்கும் பரமசிவன் கேட்க.
பரிவுற்று ஒரு சொற் பகர்வோனே – பரிவோடு அந்தப் பிரணவத்துக்கு விளக்கம் சொன்னவனே

ஒரு சின்ன take diversion. குழந்தைகள் நமக்குத் தெரிஞ்ச விஷயத்தையே சொன்னாலும் அதைத் திரும்பத் திரும்பக் கேக்க ஆசையா இருக்கும். முருகனைப் போல ஒரு பிள்ளை பேசுனா? ஒரு காதுல கேட்டாப் போதாதுன்னு ரெண்டு காதுலயும் கேட்டார் சிவன்னு இன்னொரு பழனி திருப்புகழ்ல அருணகிரிநாதர் சொல்லியிருக்காரு.

சிவனார் மனங்குளிர உபதேச மந்திரம் இருசெவிமீதிலும் பகர் செய் குருநாதா

பவளத் தவளக் கனகப் புரிசை பழனிக் குமரப் பெருமாளே
பவளம்(பவழம்) – செந்நிறம்
தவளம் – வெண்ணிறம் (தவளகிரின்னு இலங்கையில் ஒரு ஊர் இருக்குது)
கனகம் – பொன்னிறம்
புரிசை – மதிற்சுவர்
செந்நிறத்திலும் வெண்ணிறத்திலும் பொன்னிறத்திலும் அழகிய மதில்களை உடைய பழனிக் குமரப் பெருமானே!

இதுதான் இந்தத் திருப்புகழோட நேரடியான எளிய பொருள். இப்பப் பாடலை முழுசாப் படிச்சா ஒங்களுக்கே பொருள் எளிமையாப் புரியும்.

அணிபட் டணுகித் திணிபட் டமனத்தவர்விட் டவிழிக் …… கணையாலும்
அரிசுற் றுகழைத் தவர்பெற் றவளத்தவன்விட் டமலர்க் …… கணையாலும்
பிணிபட் டுணர்வற் றவமுற் றியமற் பெறுமக் குணமுற் …… றுயிர்மாளும்
பிறவிக் கடல்விட் டுயர்நற் கதியைப் பெறுதற் கருளைத் …… தரவேணும்
கணிநற் சொருபத் தையெடுத் துமலைக் கனியைக் கணியுற் …… றிடுவோனே
கமலத் தயனைப் ப்ரணவத் துரையைக் கருதிச் சிறைவைத் …… திடுவோனே
பணியப் பணியப் பரமர்ப் பரவப் பரிவுற் றொருசொற் …… பகர்வோனே
பவளத் தவளக் கனகப் புரிசைப் பழநிக் குமரப் …… பெருமாளே!

உங்க வசதிக்காகக் கொஞ்சம் சீர் பிரிச்சுக் கீழ கொடுத்திருக்கேன். படிக்க எளிமையா இருக்கும்.

அணிபட்டு அணுகித் திணிபட்ட மனத்தவர் விட்ட விழிக் கணையாலும்
அரி சுற்று கழைத் தவர் பெற்ற வளத்தவன் விட்ட மலர்க் கணையாலும்
பிணிபட்டு உணர்வற்று அவமுற்று இயமற் பெறும் அக்குணமுற்று உயிர்மாளும்
பிறவிக்கடல் விட்டு உயர் நற்கதியைப் பெறுதற்கு அருளைத் தரவேணும்
கணி நற்சொருபத்தை எடுத்து மலைக்கனியைக் கணியுற்றிடுவோனே
கமலத்து அயனைப் ப்ரணவத்து உரையைக் கருதிச் சிறைவைத் திடுவோனே
பணி அப்பு அணி அப்பரமர்ப் பரவப் பரிவுற்று ஒருசொற் பகர்வோனே
பவளத் தவளக் கனகப் புரிசைப் பழநிக் குமரப் பெருமாளே!

பழனி முருகன் திருவருளால் எல்லோரும் எல்லா நலமும் பெற்று வாழ வணங்குகிறேன்.

அன்புடன்,
ஜிரா

Advertisements

About GiRa ஜிரா

சிவனுக்கும் சீவனுக்கும் இடையில் இருப்பது நந்தி. சிவன் கடவுள். சீவன் வாழ்க்கை. கடவுளுக்கும் வாழ்க்கைக்கும் இடையில் இருப்பது நந்தி.
This entry was posted in இறை, திருப்புகழ், முருகன் and tagged , , , , , . Bookmark the permalink.

8 Responses to அணிபட்டு அணுகி – பழனி திருப்புகழ்

  1. amas32 says:

    ரொம்ப அருமை ஜிரா 🙂 எளிமையா விளக்கறீங்க. அது தான் உங்கள் பலம். வாழிய பல்லாண்டு 🙂

    amas32

  2. yarlpavanan says:

    தை பிறந்தாச்சு
    உலகெங்கும் தமிழ் வாழ
    உலகெங்கும் தமிழர் உலாவி வர
    வழி பிறந்தாச்சென வாழ்த்துகிறேன்!

  3. எளிமையான, அதே சமயம், பொருள் பொதிந்துறை விளக்கம்.
    விளக்கம் வாங்கிய ரவிக்குமாருக்கு நன்றி.
    பொங்கல் வாழ்த்துக்கள் அனைவருக்கும்.

    //காமம் தவறா?//

    பொதுவா, பல தமிழ்ச் சொற்களுக்கும், வினை (Action) தான் அடிப்படை
    பலவும் காரணப் பெயர் தான்!

    விரும்பு-வதால்-> விருப்பம்
    உண்-ணுவதால்-> உணவு
    பொங்கு-வதால்-> பொங்கல்
    வடு-ப்பதால்->வடை
    பதி-வதால்-> பதிவு

    ஆனா, காமம்? = இதற்கு என்ன வினை?
    ஆனா, காதல்? = இதற்கு என்ன வினை?
    ….இவை, வினையால் வந்த காரணப் பெயர்களா? யோசித்துப் பார்த்தால், காமம் தவறா? என்று புரிந்து விடும்:)

    இன்று தான்..
    *காமம்= பாலியல்
    *காதல்= அன்பியல்
    …என்று ஆகி விட்டது! ஆனால், சங்கத் தமிழ் தொட்டு.. காமம்/காதல்= ஒரு கொடிப் பூவே!
    கொடியின்றிப் பூ இல்லை; பூ இன்றி கொடிக்கும் மதிப்பு இல்லை!

    அந்த “மதிப்பு” தவறியதால் தான், அருணகிரி துன்புற்றார்
    மதிப்பை= மீட்டுக் குடுத்தவன் முருகன்!

    • //அணிபட்டு அணுகி, திணிபட்ட மனத்தவர்//

      எங்கூரு “திருவண்ணாமலைத் தாசி”கள்:)
      அதென்ன அணிபட்டு? திணிபட்ட?

      திணிபட்ட= கல் நெஞ்சம் என்பது மேலோட்டமான பொருளே!

      சிற்சில அருணகிரி சொல்லாட்சிகள் நம்மை வியக்க வைக்கும்!
      *நகை ஏவு
      *பனிப் பானு
      *சந்திர நிறங்கள்
      *இங்கித மணவாளா
      ஏன்யா, இவரு மட்டும் இப்படியொரு சொல்லைக் கொண்டாந்து போடுறாரு-ன்னு யோசிக்க வைக்கும்!

      அப்படியொரு சொல்= “திணி பட்ட”

      ஒரு செம்புக்குள், கொஞ்சம் மல்லிப் பூக்களைப் போட்டுப் பாருங்க..
      திடீர்ன்னு இன்னும் கொஞ்சம் பூக்கள் கிடைக்குது; ஆனா அதையும் செம்புக்குள் போட, அவ்ளோவா இடம் இல்லை..
      ஆனா கொஞ்சம் “அழுத்தினால்” போட முடியும்:) திணித்தாலும், பூக்கள் இடம் கொடுக்கும்!:)

      ஆனா, அதே செம்புக்குள் மண்ணைப் போட்டுப் பாருங்க! என்ன நடக்குது?:)
      பூமியும் அப்படித் தான்!
      மண்ணே, “திணி பட்டு”, “திணி பட்டு” = கல் ஆகும்!
      அதான் திணிபட்டு= கல் நெஞ்சம்!

      மண்”திணி” ஞாலம்-ன்னு சொல்லும் மணிமேகலை!

      அருணகிரி, சிலம்பு-மேகலை எல்லாம் வாசிச்சிருப்பாரு; என்ன இருந்தாலும் கூத்து/கலைக் குடும்பம் அல்லவா?
      அவரின் அத்தனை “தாள-சங்கதி”களும், அவர் முன்பே படித்த கலை தான்!

      எப்படி, பல மண் துகள்களே.. இறுகி இறுகி= கல் ஆவுதோ
      அப்படி, பல எண்ணங்களால்.. மனமே இறுகி இறுகி= “திணி பட்ட”

    • “படுதல்” என்பது ஒரு நுட்பமான சொல், தமிழில்!

      *செய்= நாமளே செஞ்சிடறது
      *செய்யப்படு= ஒன்றால் செய்யப்படுவது

      தலைப்படுதல், ஆற்றுப்படுதல்.. இப்படிப் பல “படுதல்” உண்டு தமிழில்!
      அணி”பட்டு” அணுகி, திணி”பட்டு” மனம்

      *வரிசையா பல பெண்கள் இருப்பது வேறு
      *வரிசைப்”படுத்தி” பல பெண்கள் இருப்பது வேறு:)

      முன்னது= இயல்பு
      பின்னது= ஒரு காரணத்துக்காக, வரிசைப்”படுத்தப் பட்டது”

      நல்ல காதலி = நாம் “வேறு ஒருவரை” நாடிப் போனால்..
      ஒன்னு.. கோவப்பட்டுத் துன்பப்படுவாள்
      இல்லை.. நம் மீது அவருக்கு அன்பு குறைந்தது ஏனோ? -ன்னு தனக்குள் அடங்கித் துன்பப்படுவாள்

      ஆனா, இங்கிட்டு பாருங்க! = நீ எங்களில் யாரை வேணும்ன்னாலும் எடுத்துக்கோ.. எங்களுக்குத் துன்பமே இல்லை!:)
      நீ வந்தா போதும்..
      Nopes, உன் பணம் வந்தால் போதும்:)

      அணி”பட்டு” அணுகுறாங்க!
      திரட்டப்பட்டு, திருடறாங்க!

      இதான், அணி்”பட்டு” சூட்சுமம்
      திணி”பட்டு” சூட்சுமம்!

      மனசை மட்டும் “திணிபட” விடவே கூடாது!
      திணிபட, திணிபட.. கண்முன்னே அன்பானது/நல்லது-ன்னு தெரிஞ்சாலும், இடம் கொடுக்காது “திணிபட்டுரும்”:(

      அந்தப் பூச் செம்பு, மண் திணிபட்ட செம்பை ஞாபகம் வச்சிக்கோங்க! அருணகிரி பட்ட பாடம், எளிதில் புரிஞ்சீரும்!

      அருணகிரி, காமத்தில் உழன்றாலும், மனம் திணிபடலை= மீண்டார்
      அந்தப் பெண்கள், மனம் திணிபட்டது= மீளவில்லை

  4. //அரி சுற்று கழைத் தவர் பெற்ற வளத்தவன்//

    “அருணகிரியின் பாடல்களில் மன்மதன்”
    -ன்னு யாரேனும் ஆய்வுக் கட்டுரை செய்யலாம்;
    அத்துணை தகவல்கள் கொட்டி இருப்பாரு அருணகிரி:) விறல் மாரன் ஐந்து மலர் வாளி உட்பட..

    கழைத் தவர்= கரும்பு வில்
    ஆனா, அதென்ன வண்டு சுற்று?

    மன்மதன் வில்லுக்கு, நாண் என்னும் கயிறே= வண்டுகளின் வரிசை தானாம்!:)

    வண்டு, ஒரு இடத்துல நிக்குமா?
    அத்தினி வண்டுகளும் திசைக்கொன்னாய்ப் பறக்க.. அத்தனையும் சமாளிச்சி, வண்டு வரிசையே நாண் ஏற்றி, அம்பு விடுறான்! அத்தினி தெறமை:)

    இனி வில்லுக்கு விஜயன்-ன்னு சொல்லாதீக, வில்லுக்கு= மன்மதன் தான்:))

    பணியப் பணியப் பரமர் = பணி + அப்பு + அணி + அப் + பரமர்
    இதை மிகவும் ரசித்தேன்:)

    பணித் தலையர் = பாம்பு உள்ள சடையர்!
    பலர் எழுதும் போதும், “வெள்ளிப் பனித் தலையர்” = சிவபெருமான் சடையை, நரைச்ச தலைமுடி ஆக்குறாங்களே-ன்னு கோவங் கோவமா வரும்! னகர-ணகர ஒலிப்பு இன்னும் முன்னேறணும்…

    அரவப் “பணி அல்குல்” = பாம்பு போல் Curve உள்ள அல்குல், இதை மட்டும் சரியா ஞாபகம் வச்சிப்பீங்களே?:)
    அதே போல, வெள்ளிப் “பணித் தலையர்” -ஞாபகம் வச்சிக்கோங்க, Please:)

  5. //பரிவுற்று “ஒரு சொற்” பகர்வோனே//

    ஓம்= அ, உ, ம் என்ற மூன்றெழுத்துக் கூட்டாக இருந்தாலும், அது ஓரெழுத்து/ஒருசொல் தான்!

    //மூல மாகிய ஒற்றை யெழுத்தை
    மூன்று மாத்திரை. உள்ளெழ வாங்கி//-ன்னு பாசுரம்; அருணகிரி, “ஒருசொல்” பகர்வோனே என்று ஒரே வரியில் காட்டி விடுகிறார்

    எல்லாத் தலங்களிலும், அதிகமான திருப்புகழ் பெற்ற தலம்= பழனி!

    பழனம்/பழனி= பழ வயல்; கழனி= பயிர் வயல்
    வேளாண்மைத் தமிழ்!
    புராணக் கதைகளை விட, பழ”னி” என்று எழுதலே தமிழுக்கு அழகு!

    பழனிக் குமரப் பெருமானே!
    கதியைப் பெறுதற்கு
    அருளைத் தரவேணும்
    எனது முன் ஓடி வரவேணும்!

    முருகா!

    • Ravikumar says:

      “திணிபட்ட “அருமையான விளக்கம் தலைவரே….கேஆர்எஸ்…

I am eager to hear what you want to say. Please say it. here. :)

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s