அண்ணாமல – விமர்சனம்

அண்ணாமலை ரொம்பப் பழசாச்சே. அதுக்கு இப்பத்தானா விமர்சனம் எழுதுறதுன்னு நீங்க கேக்குறது எனக்கு நல்லாவேப் புரியுது. ஆனா அண்ணாமலை பழசானாலும் புதுசாப் பாக்குவனுக்குப் புதுசுதானே. அதான்.

ரஜினி நடிச்ச அண்ணாமலை படத்தைப் பத்திப் பேசல. ரஜினி கும்பிடப் போற அண்ணாமலையைச் சொன்னேன். திருவண்ணாமலை.

ரொம்ப நாளாத் திட்டம் போட்டு சென்னைக் கம்பன் கவிமன்றத்து ஆட்கள்ளா சேந்து ரெண்டு நாள் போயிட்டு வந்தோம்.

mokrish@twitter aka மோகன் தான் டூருக்கு வாத்தியார். நாங்கள்ளாம் நல்ல மாணவர்கள் மாதிரி அமைதியாப் போயிட்டு அமைதியா வந்தோம் (வாத்தியார் சாரைக் கேட்டாதான் உண்மை என்னன்னு எங்களுக்கே தெரியும்).

சாலிகிராமத்தில் கம்பன் கவிமன்ற ஹெட்குவார்ட்டர்ஸ் தான் மீட்டிங் பாயிண்ட். பிவிஆர் சார் தம்பதி, மோகன் – இராதா தம்பதி, ஷேகர் சார், சுதர்சன், வீரு, முத்தலிப், ஆனந்த்.. இவங்களோட நானும். வந்தவங்களுக்கெல்லாம் அமாஸ் அம்மா வீட்டுக் காப்பி. எனக்கு மட்டும் ஸ்பெஷலா புரோட்டின் டிரிங்க். நாந்தான் காப்பியே குடிக்க மாட்டேனே.

வேன் டிரைவர் இளையராஜா ரசிகர். டைரியோட மொதப்பக்கத்துல இராஜாவை பென்சில்ல வரஞ்சு இராஜாவோட நினைவொப்பத்தையும்.. அதாங்க ஆட்டோகிராப் வாங்கியிருக்காரு. அழகான படம். மொபைல்ல படம் பிடிக்காம விட்டுட்டேன். வழில கேட்ட பாட்டெல்லாம் அவர் உபயந்தான்.

சென்னையை விட்டு வெளியே போறப்போ ஒரு மணி நேரத் தொலைவுல ஒரு சாப்பாட்டுக்கடை. அதுதான் 99கிலோமீட்டராம். சென்னைல எந்த எடத்துல இருந்து 99 கிமீ தூரம்னு கேக்காம விட்டுட்டேன். அந்தக் கடை பேரு ஹரிதம். ஹரிதம்னா சமஸ்கிருதத்துல பசுமை. சுத்தபத்தமா இருந்தது. யோசிக்காம நிறுத்தலாம். சாப்பிடலாம். யாரெல்லாம் மினிமீல்ஸ் சாப்டாங்க, யாரெல்லாம் முழுமீல்ஸ் சாப்டாங்கன்னு நான் சொல்ல மாட்டேன்.

வேன் டிரைவர் இராஜா ரசிகரா இருந்தாலும் எம்.எஸ்.வி, சங்கர்-கணேஷ், சந்திரபோஸ் பாட்டெல்லாம் கூடப் போட்டாரு. சில பாட்டெல்லாம் சங்கர்-கணேஷ்னு நம்ப முடியாம முத்தலிப் ஆச்சரியப் பட்டதைச் சொல்லியே ஆகனும்.

திண்டிவனத்துக்குப் பிறகு திருவண்ணாமலைக்குத் திரும்புனதும் ரோட்டையே காணோம். கிணத்தக் காணோம்னு வடிவேலு சினிமால புகார் கொடுத்த மாதிரி ரோட்டைக் காணோம்னு யாரும் புகார் கொடுக்கல போல. உக்காந்து போன எங்களுக்கே எலும்பெல்லாம் எகுறுச்சு. வண்டிய ஓட்டுனவருக்கு எப்படியிருந்திருக்குமோ! ஐயோ பாவம்.

செஞ்சிக் கோட்டைய ரோட்டுல இருந்தே பாத்துட்டு திருவண்ணாமலைக்கு நேராப் போயிட்டோம். மோகன் வீட்ல கொஞ்சம் உக்காந்துட்டு மொதல்ல ரமணாசிரமம் போனோம். இருக்குறது திருவண்ணாமலையா டிரான்சில்வேனியாவான்னு சந்தேகம் வர்ர அளவுக்கு வெளிநாட்டு மக்கள் கூட்டம். அதுவும் வேட்டி சேலையெல்லாம் கட்டிக்கிட்டு. நான் ஜீன்ஸ் டிஷர்ட்ல தான் போனேன்.

ரமணரோட வாழ்க்கையே எளிமைக்கு எடுத்துக்காட்டு. அவரையே கடவுளாக்கி அஷ்டோத்திரம் சொல்லி நைவேத்யம் படைக்கிறதுல எனக்கு உடன்பாடு இல்லை. அதுக்கு பதிலா அவர் கருத்துகளைப் பரப்பலாம். நான் சொன்னால்லாம் யாரும் கேக்குறதில்ல. அதுனால நானும் அங்க சொல்லல. ஆனாலும் வெள்ளக்காரங்க தமிழ்ப் பாட்டை இங்கிலீஷ்ல எழுதி வெச்சிப் பாடுறதக் கேக்க நல்லாயிருந்தது.

அடுத்து கோயில். கோயிலையும் கோயிலைச் சுத்தி இருக்கும் எடங்களையாச்சும் துப்புரவா வெச்சுக்கனும்னு நம்ம மக்களுக்கு எப்பத் தோணுமோ? கடவுள் இருக்கும் இடம்னு நம்புனா குப்பை போடத் தோணுமா? கோயிலுக்குள்ளயே… சரி. விடுங்க. எதுவும் சொன்னா என்னையும் நாத்திகன்னு சொல்லிருவாங்க.

அருணகிரிநாதர் வழியா நான் தெரிஞ்சிக்கிட்டதுதான் திருவண்ணாமலை. அவர் தற்கொலை செஞ்சுக்க ஏறிக் குதிச்ச கோபுரம், கோபுரத்து இளையனார் கோயில், கம்பத்து இளையனார் கோயில்லாம் பாத்து எனக்கு அவ்வளவு மகிழ்ச்சி. கம்பத்து இளையனார் கோயில்ல “அருணகிரிக்கு முருகன் காட்சி கொடுத்த இடம்”னு எழுதி வெச்சிருக்காங்க. அது கோபுரத்து இளையனார் கோயில். அதைப் பூட்டி வெச்சிருக்காங்க. யாரும் போறதில்ல போல. கம்பத்து இளையனார் கோயில் தான் அருணகிரி பாட்டுப் பாடி ஊருக்கு முன்னாடி முருகனை வரவழைச்ச இடம்.

அண்ணாமலையாரையும் ரொம்ப நல்லாப் பாத்தாச்சு. அவரும் எங்கள ரொம்ம்ம்ம்ம்ம்ப நல்லாப் பாத்திருப்பார்னு நம்புறேன். அண்ணாமலையார் கோயிலுக்குள்ள அவ்வளவு வெப்பம். ஜோதியா சிவபெருமான் நின்ன எடம்னு சொல்றாங்களே. அண்ணாமலைக்குப் பிறகு உண்ணாமுலையம்மனையும் பாத்தாச்சு. யானையைப் பாத்ததும் பூனையாப் பம்முன முத்தலிப்ப குண்டுக்கட்டா தூக்கிட்டுப் போய் யானையோட தீண்டல் எப்படியிருக்கும்னும் காட்டியாச்சு.

யானை தும்பிக்கையால தடவுனதால அரண்டு அமைதியான முத்தலிப்பப் பேச வைக்கிறதுக்காகப் பிரசாதக் கடைக்குக் கூட்டீட்டுப் போனோம். கோயிலுக்குப் போனா சாமி கும்பிடுறோமோ இல்லையோ, பிரசாதம் வாங்கியே ஆகனும். புளியோதரையையும் அதுக்கு சைடிஷ்ஷா மிளகுவடையையும் வாங்குனோம். நல்லாவே இருந்தது. இதையே அப்பிடைசரா நெனச்சிக்கிட்டு நேரா அடையாறு ஆனந்தபவன்ல ஆனந்தமா ராத்திரி டிபனை முடிச்சோம்.
IMG_2604
திருவண்ணாமலை கொசுவெல்லாம் நல்ல ஆரோக்கியமா இருக்கு. பத்து கொசு சேந்தா பிந்துகோஷையே தூக்கலாம். ஆரோக்கியமான திருவண்ணாமலை மக்கள் கொசுக்களுக்கு நல்லபடி ரத்ததானம் பண்றாங்கன்னு புரிஞ்சிக்கிட்டேன். நல்லவேளையா மோகன் வீட்ல கொசுவலையெல்லாம் போட்டிருந்ததால தப்பிச்சோம்.

ஒரு கூட்டம் விடியக்காலைலயே (நடுராத்திரி) எந்திரிச்சு கிரிவலம் போயிட்டாங்க. இன்னொரு கூட்டம் காலைல எந்திரிச்சு கார்வலம் போயிட்டாங்க. அதாங்க….. கார்லயே கிரிவலம். இன்னும் ரெண்டு பேரு…. நல்லாத் தூங்கி எந்திரிச்சு.. கார்வலம் போனவங்க வாங்கிட்டு வந்த இட்லி தோசை வடையெல்லாம் சாப்டாங்க. இதுல நான் எந்த வகைன்னு ஒங்க ஊகத்துக்கே விட்டுர்ரேன். சும்மாச் சொல்லக்கூடாது. திருவண்ணாமலை ராமகிருஷ்ணாவுல ஷேகர் சார் வாங்கிட்டு வந்த டிபனெல்லாம் அட்டகாசம்.

சூப்பர் சிங்கர் நிகழ்ச்சிய டிவிலதான் பாக்கனுமா? நேர்ல பாக்க முடியாதான்னு நெனச்ச எங்களுக்காக ஒரு சூப்பர் சிங்கர் பாட்டு பாடினார். மோகன் தான் அந்த சூப்பர் சிங்கர். நிலவே என்னிடம் நெருங்காதே பாடும்போது பி.பி.எஸ்சின் குழைவு கலக்கல். மௌனத்தில் விளையாடும் மனசாட்சியே பாடும்போது பாலமுரளிகிருஷ்ணாவோட கம்பீரம் கனகச்சிதம். இன்னும் தொடர்ந்து நெறைய பாடுங்க மோகன்.

மோகன் -இராதாவோட உபசரிப்பைக் குறிப்பிட்டு சொல்லியே ஆகனும். எங்களுக்கு என்னென்ன தேவைப்படும், எதெது கேப்போம்னு எல்லாமே யோசிச்சு ஏற்பாடு செஞ்சிருந்தாங்க. மோகன் -இராதா, “ஒங்க ரெண்டு பேருக்கும் நாங்க நன்றி சொல்ல மாட்டோம். ஆனா….. இன்னைக்கு உங்களோட திருமணநாள். எப்பவும் ஆண்டவன் ஒங்கள நல்லபடி பாத்துக்க வேண்டிக்கிறோம்.”

அடுத்து நேரா எஸ்.கே.பி.கருணா சார் தோட்டத்துக்குப் போனோம். அருமையான இயற்கை விவசாயத் தோட்டம். பூச்சிமருந்து இல்ல. செயற்கை உரமில்ல. மனிதன் தொடக்கூடாத எதுவுமே இல்ல. செடில இருந்து பறிச்சு அப்படியே சாப்பிடலாம். நெல்லிக்காயும் மக்காச்சோளமும் வேணும்னு கேட்டு வாங்கினேன். பெருந்தன்மையா பை நெறையப் போட்டுக் கொடுத்தாரு. தோட்டத்து எளனி அபாரம்.

இயற்கை விவசாயம் செஞ்சு ஆர்கானிக் காய்கறிகளை விளைவிச்சு மக்களுக்குக் கிடைக்கச் செய்யனும்னு பாடுபடுறாரு கருணா சார். இதையெல்லாம் அவர் செய்யனும்னு அவசியமே இல்ல. ஆனா அதை ஆர்வமாப் பண்ணனும்னு நெனைக்கிற அவரோட எண்ணத்துக்கு ஒரு சல்யூட்.

அவரோட தோட்டத்தை ஒட்டியிருக்கும் வைரக்கல் மலைல கல் எடுத்துதான் வள்ளுவர் கோட்டத்துத் தேருக்குச் சக்கரமெல்லாம் செஞ்சாங்களாம்.
IMG_2633
அவரோட காலேஜ் கெஸ்ட் ஹவுசில் மதிய விருந்து. கடவுள் கஞ்சத்தனமா ஒரேயொரு வயிறு மட்டும் குடுத்துருக்காரேன்னு திட்டிக்கிட்டே சாப்பிட்டேன். ஐமேக்ஸ் ஸ்கிரீன் மாதிரி எலை. கைய இந்தக் கடைசிக்கும் அந்தக் கடைசிக்கும் மாத்தி மாத்திக் கொண்டு போய் கைவலியே வந்துருச்சு. அத்தனை சாப்பாட்டு வகை எலைல. சமைச்ச ஏசையன்னுக்குக் கெளம்புறப்போ ஒரு நன்றி தனியாச் சொன்னோம்.

கருணா சார், ”உங்க அன்புக்கும் விருந்தோம்பலுக்கும் சென்னைக் கம்பன் கவிமன்றம் சார்பா நன்றியும் வணக்கங்களும்.”

உண்ட மயக்கத்தோட திருவண்ணாமலைல இருந்து கெளம்புனோம். ஒவ்வொருத்தரோடயும் பேசுறதுக்கு எவ்வளவு விஷயங்கள் இருக்குது. அந்தப் பேச்சு சுவாரசியத்துலயே சென்னைக்கு வந்துட்டோம். அடுத்த பயணம் கோயில் கொளம்னு இல்லாம ஜாலி டிரிப்பா இருக்கனும்னு முடிவெடுத்திருக்கு. போயிட்டு வந்து இதே மாதிரி இன்னொரு பயணப் பதிவுல சந்திப்போம்.

அன்புடன்,
ஜிரா

Advertisements

About GiRa ஜிரா

சிவனுக்கும் சீவனுக்கும் இடையில் இருப்பது நந்தி. சிவன் கடவுள். சீவன் வாழ்க்கை. கடவுளுக்கும் வாழ்க்கைக்கும் இடையில் இருப்பது நந்தி.
This entry was posted in அனுபவங்கள், திருவண்ணாமலை, பயணம் and tagged . Bookmark the permalink.

16 Responses to அண்ணாமல – விமர்சனம்

  1. amas32 says:

    super ஜிரா 🙂 நான் வராதக் குறையை உங்கப் பதிவைப் படித்துத் தீர்த்துக் கொண்டேன் 🙂 நிறைய இது போல நம் குழு பயணங்கள் மேற்கொள்ள இறைவன் அருள் புரியட்டும்.

    amas32

    • GiRa ஜிரா says:

      அடுத்த டிரிப்புக்கு நீங்க வர்ர மாதிரி ஏற்பாடு பண்ணீறலாம்மா. We missed you in this trip.

  2. N Shekar says:

    GiRa – such a super writeup – relived the trip entirely – your sense of humour very well laced the writing. Yes. A big thanks to Radha and Mohan, and SKP Karuna for their super hospitality indeed.

  3. pvramaswamy says:

    Excellent GiRa. You brought out the essence nicely. This trip was special for a couple of reasons.
    #First outing of Kamban class mates.
    #Happened immediately after our (PVR, Geetha) wedding day and just before Mohan, Radha Wedding day.
    #Sure to have given the bachelors in the trip to plan their plans.
    #TCS Prasanna introduced Haritham, a clean nice food joint to us.

    #Personally, to me it was immensely joyful:
    – Enjoyed the hospitality of Radha & Mohan
    – Engaging conversations on any and every subejct with you guys
    – Met KPK Karuna for the 1st time and amazed by his outlook to life

    #Missed @amas and @TCS Prasanna
    #Awaiting a photo-story from @Sudharsan

  4. tcsprasan says:

    Excellent write up Gira. I have missed such an wonderful trip. :-((((((

  5. திருவண்ணாமலைக்கு சுற்றுலா! கூடவே வந்த உணர்வு.

  6. திருவண்ணாமலைக்குக் கூட்டிப் போனதுக்கு நன்றி! நீங்க இருக்கீங்களா படத்தில்? இப்ப கொஞ்ச நாளா யார்கிட்ட பேசினாலும் திருவண்ணாமலையைப் பற்றியேதான் காதில் விழுந்துகிட்டே இருக்கு…ஹ்ம்… என்னவா இருக்கும்?

    • GiRa ஜிரா says:

      நல்லாருக்கேன். நீங்க நலமா?
      எல்லாம் மாயையா இருக்கும் 🙂 ஒரு எட்டு திருவண்ணாமலைக்குப் போயிட்டு வந்துருங்க

  7. பதிவை படித்து முடித்ததும் ஏப்பம் வந்தது. ஏனோ தெரியவில்லை 🙂

  8. இனிய சு(சி)ற்றுலா..
    எங்க திருவண்ணாமலைக்கு மீள்-நல்வரவு:)
    அப்படியே எங்க வாழைப்பந்தல் கிராமத்துக்கும் நல்வரவு!

    உண்ணாமுலை உமையாளொடும்
    – உடன் ஆகிய ஒருவன்

    பெண்ணாகிய பெருமான்
    – மலை திருமா மணி திகழ

    மண்ணார்ந்தன அருவித் திரள்
    – மழலை முழவு அதிரும்

    அண்ணாமலை தொழுவார்
    வினை – வழுவா வண்ணம் அறுமே!

    அண்ணா(த) மலை = அண்ணா-மலை (தேவரும் நெருங்க முடியாத சோதி மலை)

    அண்ணா(த) = நெருங்க முடியாத
    அண்ணா(த) = ஈறு கெட்டு, அண்ணா-மலை ஆயிற்று;
    ஈறு கெட்ட எதிர்மறைப் பெயரெச்சம்!

    சேகர் சார்..
    அப்படியே, ரெட்டைப் பிள்ளையார் கோயில் தெருவுக்கும் போய், உலகப் புகழ் பெற்ற தயிர் வடை ஸ்தாபனம் = கணேஷ் பவனில்,
    காரா பூந்தி, கறிவேப்பிலைத் தூள் தூவிய…சுறுசுறு தயிர் வடை, வாங்கி இவுங்க எல்லாருக்கும் தரவும்:))

  9. //சில பாட்டெல்லாம் சங்கர்-கணேஷ்னு நம்ப முடியாம முத்தலிப் ஆச்சரியப் பட்டதைச் சொல்லியே ஆகனும்//

    ha ha ha…

    //யானையைப் பாத்ததும் பூனையாப் பம்முன முத்தலிப்பை//

    :))))))))))))
    பூனை முடியெல்லாம் எவன்செய்யும் யாக்கை
    யானைமுடி அன்பில் அவர்க்கு:)

    மோகன்-இராதா… இசை உணவு+ஊண் உணவு – ரெண்டுக்குமே நன்றி!
    மகிழ் திகழ் மண நாள் வாழ்த்துக்கள்!

    SKP கருணா…
    உழுதுண்டு வாழ்வாரே வாழ்வர்! வாழி, நலம் சூழ!
    தோட்டத்து எளநி மட்டும் தானா? பனையேறி நுங்கு தரவில்லையா?:)

    தங்கள் இல்லச் சாளரம் வழியாக.. அந்த Special Darshan அனைவருக்கும் காட்டினீர்களா? மருதம் + மலை சேர்ந்த உங்கள் தனிப்பட்ட மருத-மலை:)

    //வேன் டிரைவர் இராஜா ரசிகரா இருந்தாலும் எம்.எஸ்.வி, சங்கர்-கணேஷ், சந்திரபோஸ் பாட்டெல்லாம் கூடப் போட்டாரு//

    :))) இசைக்கு, மனித வேறுபாடுகள் இல்லையே! அதான்!
    இசை, எங்கு பிறப்பினும் இசையே!

    பிறப்பொக்கும் எல்லா இசைக்கும் – சிறப்பொவ்வா
    தனிமனித வேற்றுமையான்!

  10. //அந்தக் கடை பேரு ஹரிதம்.
    ஹரிதம்னா சமஸ்கிருதத்துல பசுமை//

    ஹரிதம் = பச்சையும் மஞ்சளும் கலந்தவொரு பழுப்பு நிறம்; பச்சை-ன்னும் சொல்லலாம்!
    ஐயப்பன் பாட்டுல வருமே.. சூரியன் குதிரைகளின் நிறம்;

    ஹரிவராசனம் விஸ்வ மோகனம்
    “ஹரித”தீஸ்வரம் ஆராத்ய பாதுகம்

    ஆனா.. இன்னொரு ஹரிதமும் இருக்கு! Harita Finance ன்னுல்லாம் TVS Companyகாரவுக, பேரு வச்சிருப்பாங்க!
    ஹரிதம் = பிராமணர்களின் கோத்ரம்; ஹரித/ ஹாரீத கோத்ரம்

    கோத்ரம்/சாதியாக வைக்காமல்.. பசுமை என்ற “நோக்கத்திலேயே” பேர் வைத்ததாக நம்புவோம்! நல்லதே நம்பல் நன்மை!

    //ரமணரோட வாழ்க்கையே எளிமைக்கு எடுத்துக்காட்டு. அவரையே கடவுளாக்கி அஷ்டோத்திரம் சொல்லி நைவேத்யம் படைக்கிறதுல எனக்கு உடன்பாடு இல்லை//

    🙂
    அவர் உயிரோடு இருந்தப்பவே, “பகவான்” ஆக்கி, அஷ்டோத்ர/ நைவேத்ய/ ஷட்கால பூஜையெல்லாம் செய்யத் துவங்கியாச்:( நம்ம மக்கள் நல்ல மக்கள்:)

    இன்றைய ரமணாஸ்ரமத்தில் ஒரே ஆறுதல்
    = எங்கெங்கு காணினும் மயில்களடா!
    செவ்வேள் ஏறிய மஞ்ஞை வாழ்க! வாழ்க சீர் அடியாரெல்லாம்!

  11. //கம்பத்து இளையனார் கோயில்ல “அருணகிரிக்கு முருகன் காட்சி கொடுத்த இடம்”னு எழுதி வெச்சிருக்காங்க.
    அது கோபுரத்து இளையனார் கோயில். அதைப் பூட்டி வெச்சிருக்காங்க//

    :))))))
    கம்பத்து இளையனார் கூட, முருகன் “காட்சி” குடுத்த இடம் தானே? (அவருக்கும்+அனைவருக்கும்) So, Itz ok only naa?:)

    கோபுரத்து இளையனார் = முருகனாய்க் “காட்சி” குடுக்காமல், அடியவர் உருவில் வந்து, தற்கொலையில் காத்ததால்,
    “முருகன் காட்சி கொடுத்த இடம்”-ன்னு குறிப்பிட்டு எழுதலை போலும்! அறியேன்.. பிழை எனில் மன்னிக்கவும்!

    திரைப்படம் + மரபு வரலாற்றிலும் இப்படியே வரும்;

    உயிரைக் காப்பாற்றிய பின், “சும்மா இரு” என்று அடியவர் உருவ முருகன் சொல்லிவிட்டுப் போன பின்னர்..
    சில நாட்கள் கழித்து, மனத்தில் தவம் கூடிய பின்னரே.. “முருகன் உருவில்” வந்து, முத்து முத்தாய்ப் பாடு என்று வேல்-நா எழுதியதாய், கதை+வரலாறு!

    நீங்க ராஜ கோபுரம் வழியாக உள்ளே நுழைஞ்சீகளா? இல்லை மேற்குக் கோபுர வாசல் வழியாகாவா?

    இராஜ கோபுரம்-ன்னா, முதலில் கம்பத்து இளையனார் தான் வருவாரு! அதன் பக்கத்துல தான், கம்பம் (தூண்) நிறைந்த ஆயிரங் கால் மண்டபம்;

    கோபுரத்து இளையனார் = வள்ளாள மகாராஜா கோபுரம்; அது ராஜ கோபுரம் அல்ல! வள்ளாள கோபுரத்தில் தான் தற்கொலை முயற்சி:(

    அதையும் தாண்டி, கிளிக் கோபுரம் பாக்க முடிஞ்சுதா?
    அருணகிரி, உடலை விட்டு, கிளியாக மாறி, “அநுபூதி” பாடிய கோபுரம்!
    அதில், ஒரு பெரிய கிளிப் பொம்மை கூட இருக்கும்,
    அத்தனாம் பெரிய வெள்ளைக் கோபுரத்தில், அது மட்டும் பச்சையா இருக்கும்…..

    உம்ம்ம்..
    இன்னும் எத்தனையோ அருணகிரி கால்-தடங்கள் அங்கு!

    சிற்சில நண்பர்களை அழைத்துச் சென்று, ஒவ்வோர் இடமாய், அந்த அந்தத் திருப்புகழாய்க் காட்டி இருக்கேன்;
    ஆனால் உயிர்த் தோழனோடு மட்டும், அப்படி இதுவரை போகவே இல்லை:(

    அதல சேதனார் ஆட
    மயிலும் ஆடி நீ ஆடி – வரவேணும்!

    • Actually, Tamilnadu HRCE Dept or Some Atheenams, can undertake a project of “Arunagiri Trail” inside Tiruvannamalai Temple/ Adjoining places..

      London has Shakespeare Trail
      Paris has Victor HugoTrail, at Les Invalides & Pantheon

      ஆனா, “சந்தத் தமிழ்” இலக்கியத்தின் ஒரே தந்தையான அருணகிரிக்கு.. ஒரு வரலாற்று நினைவுத்தடம் கூட இல்லை:(((((

      —-

      வள்ளுவர்/ இளங்கோ/ கம்பன் – பல நூற்றாண்டு முந்தியதால், இதான் அவர்களின் வரலாற்று இடங்கள்-ன்னு அறுதியிட முடியாது;
      ஆனா, அருணகிரிக்கு அப்படியல்ல! 15th CE.. Just 500 yrs back; திருப்புகழில் வரும் இடங்கள் பலவும் இன்னும் அப்படியே தான் இருக்கு; Very easy to re-enact a Trail

      பழனித் தலத்துக்கு அடுத்து, அருணகிரி மிக அதிகமாகப் பாடியது = தன் சொந்த ஊரான திருவண்ணாமலை தான்!
      திருவண்ணாமலை-சமண வரலாற்று இடங்களைக் கூடக் குறிப்பிடுவாரு ஆங்காங்கே!
      பல திருவருணை (திருவண்ணாமலை) திருப்புகழ்கள் = வரலாற்றுப் பெட்டகம்!

      இது தென்பாண்டித் தமிழ் அல்ல! = நடுநாட்டுத் தமிழ்!
      சங்கம் வைக்காது, தமிழ் வளர்த்த = வடார்க்காட்டுத் தமிழ்!

      தமிழக அரசியல், தன் “இலக்கியத் தடங்களை”, வரலாற்றுப் பதிவுகளாக்கும் நாள், என்னிக்கு தான் வருமோ?
      (i can only do pulambal; my life itself in dire drowning, dunno how i can spread or inspire such things)

      atleast one small effort; Tirupugazh Geographic Map = http://murugan.org/temples/arunagirinathar_sites.htm

  12. //அடுத்த பயணம் கோயில் கொளம்னு இல்லாம ஜாலி டிரிப்பா இருக்கனும்னு முடிவெடுத்திருக்கு//

    :))))))))

    செஞ்சிக் கோட்டை, சாத்தனூர் அணைக்கட்டு -ன்னு அடுத்த நாள் போயிருக்கலாமே?
    போளூர் பக்கம், திருமலையில்.. சமணப் படுகைகள் கூட இருக்கு!

    Just 30 mins from Tiruvannamalai.. You have Tamilnadu’s Khajuraho:)
    You all shd have gone there!:)
    சின்னியாம்பேட்டை = அங்குள்ள சின்னியான் குளம்;

    அழகான கலைப்படைப்பு;
    செங்கம் மன்னன், பூப்படைந்த தன் மகள் “அறிந்து” கொள்வதற்காகக் கட்டிய படித்துறைக் குளம்!
    முழுக்க முழுக்கக் “கலவி-இயல்” சிற்பங்கள்! குளத்தின் படிக்கட்டில் கூட…
    = தமிழ்நாட்டின் கஜூராஹோ:)

I am eager to hear what you want to say. Please say it. here. :)

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s