தளிர் தவழும் தரளம் – கருமாரி வேண்டல்

நேற்றிரவு உறங்கும் முன் திருவேற்காட்டு கருமாரி அன்னையின் நினைவு உந்த இந்தப் பாடல் பிறந்தது. பாடலின் சந்தத்தையும் கொடுத்துள்ளேன். நன்றாகப் பாடக் கூடியவர்கள் பாடிக் கொடுத்தால் மகிழ்வேன். பாடலையும் பொருளையும் கீழ்க்கொடுத்துள்ளேன். கருமாரியின் அருள்மாரி உலகெங்கும் நிறைந்து கொரொனாவின் கொடுந்தாண்டவத்தையும் வென்று மக்களைக் காக்கட்டும். உலகெங்கும் வேதனையும் பீதியும் பற்றி எரிகின்ற இன்றைய சூழலில் அன்னையின் குளிர்ந்த கருணை மழை வேண்டி குளிர்ந்த பொருட்களை பாட்டில் நிறைய வைத்துப் பாடியிருக்கிறேன். அன்னையின் அருள் உலகைக் காக்கட்டும்.

தனன தன தனன தன தனன தன தானா
தனன தன தனன தன தனன தன தானா
தனன தன தனன தன தனன தன தானா
தனதான தனதான தனதான தானா

தளிர்த வழு தரள பனி குளிர்வி ழியின் தாயே
களர்கி ளறி உழும ழையின் கருமு கிலி மாயே
வெளிர்ம திய நிறங்க ளென வதன மொளிர்ந் தாயே
பழிபாவத் தடுமாற்றம் தடம்மாற்று வாயே!

துருவ முறை இம்பளிங் கில் வெருகு நடை போலே
பெருங்க வலை வலைவி ழுந்த தளர்ம னதி னாலே
அருந்து முலை அருள்கி டைக்க அழும்ம தலை நானே
கருமாரி பெயரோதக் கருதாத நாயேன்!

சுகந்த மிகுந் தகந்த மிழைக் கனகப் பதத் தாலே
அகந்தை அற தகுந்த படி எனைமி திக்க லாமே
மிகுந்த புகழ் முருகப் படை வனப்ப தியுன் ஊரே
எளியேனுங் கடைத்தேற வழிகாட்டு வாயே!

படிக்க ஏதுவாக சீர் பிரித்த பின்…

தளிர்தவழு தரளபனி குளிர்விழியின் தாயே
களர்கிளறி உழுமழையின் கருமுகிலி மாயே
வெளிர்மதிய நிறங்களென வதனமொளிர்ந்தாயே
பழிபாவத் தடுமாற்றம் தடம் மாற்றுவாயே!

பசுந்தளிர்களில் தவழுகின்ற முத்துப் போன்ற வெண்பனியின் குளிர்ந்த பார்வை கொண்ட தாயே! களர் நிலங்கள் கூட கிளறி உழுகப்படும் வகையில் விசையோடு பொழிகின்ற மழையைத் தருகின்ற கருமுகிலின் நிறத்தவளே! வெளிர் நிறத்து நிலவின் நிறங்களைப் போல் திருமுகம் ஒளிர்கின்றவளே! இந்த உலகத்தின் பழிபாவங்களில் தடுமாறி விழுந்து கொண்டிருக்கும் என்னை தடம் மாற்றுவாயே!
தரளம் – முத்து
மாயே – கருமையானவளே
மதியம் – நிலவு
வதனம் -முகம்

துருவமுறை இம்பளிங்கில் வெருகு நடை போலே
பெருங்கவலை வலைவிழுந்த தளர்மனதினாலே
அருந்து முலை அருள்கிடைக்க அழும்மதலை நானே
கருமாரி பெயரோதக் கருதாத நாயேன்!

கருமாரி என்கின்ற உன் பெயரை என்றும் ஓதிடக் கருதாத நாயைப் போன்றவன் நான்! ஏனென்றால் பசித்து அன்னையின் முலையமுதம் வேண்டுகின்ற குழந்தையைப் போல நான் அழுதுகொண்டிருக்கிறேன். அதற்கு என்ன காரணம்? மானுட வாழ்வில் இன்பதுன்பங்களால் உண்டாகும் பெருங்கவலை என்னும் வலையில் விழுந்து, துருவங்களில் உறைந்திருக்கின்ற பனியாலான பளிங்குத் தரையினிலே நடக்கின்ற பூனைப் போன்று தளர்ந்த மனத்தவனாய் இருக்கிறேன்!
துருவமுறை – துருவம் + உறை
இம்/ஹிம் – பனி (ஹிமாச்சலம், ஹிம்சாகர் எக்ஸ்பிரஸ், ஹிமாம்பசந்த் மாம்பழம் – ஹிம் + ஆம் + பசந்த்)
வெருகு – பூனை
மதலை – குழந்தை

சுகந்த மிகுந்த கந்தமிழைக் கனகப் பதத்தாலே
அகந்தை அற தகுந்த படி எனைமிதிக்கலாமே
மிகுந்த புகழ் முருகப் படை வனப்பதியுன் ஊரே
எளியேனுங் கடைத்தேற வழிகாட்டுவாயே!

தாயே, நறுமணம் கமழும் சந்தனம் இழைக்கப்பட்ட உன்னுடைய பொன்னடிகளால், என்னுடைய அகந்தை அற்றுப் போகும்படி தகுந்த வகையில் என்னை மிதிக்கலாமே! உன் திருவடி பட்டால் உய்ய மாட்டேனா!!!
மிகுந்த புகழ் கொண்ட வேற்காட்டுப் பதி உன் ஊர். அங்கு வந்தாலும் வராவிட்டாலும் முட்டாளாகிய நான் கடைத்தேற வழிகாட்டுவாயே!
சுகந்தம் – நறுமணம்
கந்தம் – சந்தனம்
கனகம் – பொன்/தங்கம்
பதம் – திருவடிகள்
முருகப்படை – வேல்
வனம் – காடு
முருகப்படை வனம் – வேல் + காடு = வேற்காடு
பதி – இடம்/ஊர்

பாட்டிலும் பொருளிலும் இருக்கும் நிறைக்கும் குறைக்கும் அவளே பொறுப்பு! எனக்குத் தெரிந்து ஓரிடத்தில் சந்தம் பிசகியிருக்கிறேன். அதையும் வேறு பிசகுகளையும் கண்டால் சொல்லுங்கள்.

அன்புடன்,
ஜிரா