இசையரசியோடு இனிய மாலைப்பொழுதில்

மொதல்ல நண்பர்கள் கலைக்குமாருக்கும் கமலாவுக்கும் நான் நன்றி சொல்லனும். சுசீலாம்மாவைச் சந்திக்கிற வாய்ப்பை ஏற்படுத்திக் கொடுத்தவங்க அவங்கதானே.

எத்தனையோ ஆண்டுகளா நெனச்சிட்டிருந்தது ஒரு நாள் நடக்குறப்போ பேரானந்தந்தான் போங்க.

எத்தன பாட்டுகள் அவங்க குரல்ல கேட்டிருப்போம். அந்தக் குரலை நேர்லயே கேக்க எவ்வளவு சந்தோஷம் தெரியுமா!

ரொம்ப அமைதியானவங்கன்னு நெனச்சேன். ஆனா நல்லா சிரிக்கச் சிரிக்கப் பேசிப் பழகுனாங்க. அவங்க குரல் மாதிரியே சுசீலாம்மா பழகுறவிதமும் இனிமை.

நான் பேரானந்தத்துல இருந்ததால என்ன நடந்ததுன்னு கோர்வையாச் சொல்லத் தெரியல. அதுனால சின்னச் சின்னக் குறிப்புகளாச் சொல்றேன்.

தென்னிந்திய மொழிகள் இல்லாம மத்த மொழிகள்ள பாடிய பாட்டுகள் பத்திப் பேச்சு வந்தது. அப்போ ஒரு பெண்டிரைவ் கொடுத்து அதுல இருக்கும் பாட்டுகள்ள ஒரியா பாட்டு போடச் சொன்னாங்க. ஆனா அதுல எது ஒரியாப் பாட்டுன்னு என்னால கண்டுபிடிக்க முடியல. ஒன்னொன்னா போட்டுப் பாக்கும் போது.. சிங்களப் பாட்டும் வந்துச்சு. சிங்களம்னு எனக்கு எப்படித் தெரியும்? பாடுனவங்கதான் சொன்னாங்க சிங்களத்துல எனக்குத் தெரிஞ்சது ரெண்டே சொற்கள்தான். ஒன்னு ஆய்புவன்(வணக்கம்). இன்னொன்னு சிங்களா(மொழியோட பேரு) 🙂

ஒரு வழியா அந்த ஒரியா பாட்டை யுடியூபுல கண்டுபிடிச்சாச்சு. கிருஷ்ண சுதாமாங்குற படத்துக்காக பாடிய பாட்டு அது. நீங்களும் கேட்டு ரசிக்கலாம்.

தெனாலிராமன் படத்துல விசுவநாதன் – இராமமூர்த்தி இசையில் ஒரு பாட்டு பாடியிருக்காங்க. சந்தனச் சர்சித நீலக்களேபர பீதவதன வனமாலி-ங்குற ஜெயதேவர் அஷ்டபதி அது. ஒடிஷா நாட்டுக்காரர் ஆன ஜெயதேவர் வடமொழியில் எழுதிய பாடல்களுக்கு அஷ்டபதின்னு பேரு. அருமையா இருக்கும். இங்க கேட்டுப் பாருங்க.

இதே மாதிரி அபூர்வமான சிலப்பதிகார கானல்வரிப்பாட்டை நினைவு படுத்தினேன். அவங்களுக்காக யுடியூபில் அந்தப் பாடலை ஓடவிட்டேன். சலீல் சௌத்ரி இசையில் பாடிய பாட்டு அது.

அப்போ அவங்க சொன்ன ஒரு விஷயத்த ஒங்களுக்குச் சொல்றேன். பொதுவா மொழி தெரியாம பாடுறப்போ முழுமையான பாவத்தைக் கொண்டு வர்ரது லேசு கெடையாது. ஏன்னா ஒவ்வொரு மொழிக்கும் ஒவ்வொரு சிறப்பு இருக்கும். மொழி தெரியாத அந்த நேரத்துல இசையமைப்பாளர் என்ன சொல்றாரோ அதுபடிப் பாடீட்டாலே போதும்.

சிலப்பதிகாரப் பாடல் பதிவு நடக்குறப்போ கானல்வரிப் பாட்டோட பொருளை அவங்களுக்கு விளக்கிச் சொல்லலையாம். சிலப்பதிகாரம் மாதிரி காப்பியங்களைப் பாடுறப்போ அதோட பொருள் தெரிஞ்சு பாடுனா இன்னும் நல்லாயிருக்கும்னு சுசீலாம்மா சொன்னாங்க. அதுனால சலீல் சௌத்ரி என்ன சொன்னாரோ அதை அப்படியே பாடினாங்களாம்.

சிலப்பதிகாரத்தை அடிப்படையா வெச்சு வெளிவந்த பூம்புகார் படத்துல அவங்க பாடிய இனிமையான பாடல்களை அப்ப நினைச்சுக்கிட்டோம்.

மெல்லிசை மன்னர் மேல ரொம்ப மரியாதையா இருக்காங்க சுசீலாம்மா. அவங்க பேசும் போதே அதப் புரிஞ்சிக்கலாம். மற்ற இசையமைப்பாளர்கள் மாதிரி இல்லாம சொல்லிக் கொடுத்ததை அப்படியே பாடனும்னு எதிர்பார்ப்பாராம் எம்.எஸ்.வி. சங்கதிகள்ள கூட சின்னச் சின்ன தவறுகள் இருக்கக்கூடாதுன்னு ரொம்ப கண்டிப்பா இருப்பாராம்.

அவரைப் பத்திப் பேசிக்கிட்டிருக்கும் போதே ஆகாயப் பந்தலிலே பாட்டைப் பாடுனாங்க. நேர்லயே கேட்டு ரசிச்சோம். அடுத்து வசந்தத்தில் ஓர் நாள் பாட்டைப் பாடுனாங்க. அதுல ரெண்டு மூனு இடத்துல தேவின்னு வரும். ஒவ்வொரு தேவிக்கும் சங்கதிகள் ஒவ்வொருவிதமா வரனும்னு எம்.எஸ்.வி சொல்லிக் கொடுத்து.. அதை அப்படியே பாடியதை ரசிச்சுச் சொன்னாங்க. எம்.எஸ்.வி க்விஸ்ல இந்தப் பாட்டைக் கொடுத்தப்ப அந்த ”தேவி”யில் வரும் சங்கதிகளை விளக்கிதான் புதிர் கொடுத்திருந்தேன். நாம ரசிச்சதையே அவங்களும் ரசிச்சிருக்காங்கன்னு தெரிஞ்சு ரொம்பப் பெருமையா இருந்துச்சு.

வசந்தத்தில் ஓர் நாள் பாடு மாதிரியே தெலுங்குல ஒரு கல்யாணப் பாட்டை பி.சுசீலா பாடியிருக்காங்க. இராஜேஸ்வரி காபி கிளப் படத்துல வரும் ஆகாஷப் பந்திரிலோ பாட்டு அது. டக்குன்னு அதை ஆகாயப் பந்தலிலே மெட்டில் பாடிக் காட்டினாங்க. பிறகு பெண்டியாலாவின் சகானா இராக மெட்டில் பாட்டில் பாடிக் காட்டினாங்க. இதுக்கு மேல நான் என்ன எதிர்பாக்க முடியும்!!!

ஆகாயப் பந்தலிலே மெட்டிலேயே தெலுங்கில் ஒரு பாட்டு வந்ததாச் சொல்லி அதையும் பாடிக் காட்டினாங்க. ஆனா என்னால அதை மூளையில் குறிச்சிக்க முடியல.

குக்க காட்டுக்கு செப்ப தெப்பா-ன்னு ஒரு தெலுங்குப் படம். நாய் கடிச்சா செருப்பால் அடி-ன்னு பொருள். எர்ராங்கி ஷர்மா இயக்கிய படம். இதுல எம்.எஸ்.வி இசைல ஏவண்டி ஏமனுகோகண்டி பாட்டைப் பாடியிருக்காங்க. அந்தப் படம் தமிழுக்கு இராணித்தேனியா வந்தப்போ இளையராஜா இசைல அதே பாட்டை என்ன சொல்லி நான் எழுதன்னு பாடியதை நினைவு படுத்தினேன்.

ஒடனே சந்தோஷமா என்ன சொல்லி நான் எழுத பாட்டைப் பாடினாங்க சுசீலாம்மா. அமுதம். அமுதம்.

சுசீலாம்மாவோட ஹம்மிங் பத்திப் பேச்சு வந்தது அடுத்து. நண்பர் வேலன் யுடீயில் நல்ல காரியம் சீக்கிரம் நடக்கனும் பாட்டை ஒலிக்க விட்டாரு. “போதும். பைத்தியம் பிடிச்சிரும்”னு சொன்னாங்க சுசீலாம்ம. ஏம்மான்னு கேட்டா.. இந்தப் பாட்டெல்லாம் கேட்டா அவ்வளவுதான்.. அதுக்குள்ளயே போயிருவோம். திரும்ப வெளிய வரவே முடியாது. அப்படியான பாட்டுன்னு சொன்னாங்க. அவங்க சொன்னது உண்மைதான்னு நமக்கே தெரியுமே!

அடுத்து காதல் இராஜ்ஜியம் எனது பாட்டைப் பாடினாங்க. இதெல்லாம் எனக்கு ரொம்ப ரொம்பப் பிடிச்ச பாட்டு. அதை அவங்க நேர்ல பாடுறப்போ எப்படி ரசிச்சிருப்பேன்னு நினைக்கிறீங்க!!!

பொதுவா பாட்டுத் தொடக்கத்தில் ஹம்மிங் வரும். இராஜவீதி பவனி வந்தது பாட்டின் முடிவில் அவங்க ஹம்மிங் வரும். அதைக் கேக்க ஆசைப்பட்டதால யுடியூபில் போட்டுக் காட்டினேன். நீங்களும் கேளுங்க.
இந்தப் பாட்டு மூன்று விதமான இசையில் வரும். முதலில் மெல்லிசை. அடுத்து முகலாய இசை. அடுத்து மேற்கத்திய இசை. இதெல்லாம் அப்பவே எம்.எஸ்.வி செஞ்சாச்சு.

செம்மொழியாக தமிழ் மொழியாம் பாட்டில் வரும் ஹம்மிங் பத்தி நினைவுபடுத்தினேன். சுசீலாம்மாவையே சுதந்திரமா அந்த ஹம்மிங்கைப் பாடச் சொன்னாராம் ஏ.ஆர்.ரகுமான்.

அடுத்து கே.வி.மகாதேவன் இசையில் ஒரு அட்டகாசமான பாட்டு. மன்னவன் வந்தானடி…. இந்தப் பாட்டு பதியும் போது ரெண்டு பகுதிகளாப் பதிஞ்சாங்களாம். சிவாஜி நடந்து வரும் தொகையறா தனியாவும் பத்மினி ஆடும் பகுதி தனியாகவும் பதிவு செஞ்சாங்களாம்.

பாடல் பதிவு நடக்குறப்போ நடிகர் திலகமே ரெக்கார்டிங் தேட்டருக்கு வந்து உக்காந்துட்டாராம். அவரைப் பாத்ததும் இவங்களுக்கு ஒரு படபடப்பு. அதை அவர் புரிஞ்சிக்கிட்டு, “அம்மா.. இந்தப் பாட்டு ஒங்கள நம்பித்தான் எடுக்குறோம்”னு சொல்லிட்டுக் கிளம்பிட்டாராம். அதுக்கப்புறம் நடந்ததெல்லாம் வரலாறு. அந்தப் பாட்டும் படமும் எவ்வளவு பிரபலமாச்சுன்னு நான் சொல்ல வேண்டியதில்ல.

கூட வந்திருந்த நண்பர் வேலன், சுசீலாம்மா பாடிய முருகன் பாடல்களா நினைவு படுத்திக்கிட்டிருந்தாரு. அப்போ புகழேந்தி இசையில் சுசீலாம்மா பாடிய முருகன் பாமாலை எனக்கு ரொம்பப் பிடிக்கும்னு சொன்னேன். அவங்களுக்கு அந்த ஆல்பம் நல்லா நினைவிருக்கு. முருகன் பாமாலைன்னு சொன்னதும் கண்டுபிடிச்சிட்டாங்க. குன்னக்குடி இசையில் அவங்க பாடிய முருகன் பாடல்களும் நல்லாருக்கும். முருகன் பாமாலையும் இன்னும் சில முருகன் பாட்டுகளையும் இங்க கேக்கலாம்.

இப்படியே சில பாடல்களைக் கேட்டும்.. அவங்க பாடியும் பொழுது அட்டகாசமா போயிட்டிருந்தது. அப்போ சில பாடல்கள்ள வர்ர இசைக்கருவிகளைக் குறிப்பிட்டுப் பேசினாங்க. எம்.எஸ்.வி எப்படி எந்தப் பாட்டுக்கு எந்த எடத்துல எந்த இசைக்கருவின்னு முடிவு செஞ்சதைப் பாராட்டிப் பேசினாங்க. பாடகர்கள் மாதிரியே இசைக்கலைஞர்களும் எம்.எஸ்.வி சொல்லிக் கொடுத்ததை அப்படியே வாசிக்கனும்னு எதிர்பார்ப்பாராம். அப்படி வாசிக்கிற வரைக்கும் விடமாட்டாராம். ஆனா எம்.எஸ்.வி அப்படி கட்டுப்பாடா இருந்ததுதான் அந்தப் பாடல்கள் சிறப்பா அமையக் காரணம்.

நடுவுல கமகமன்னு காபியெல்லாம் வந்தது. எனக்குத்தான் காபி டீ பழக்கமெல்லாம் இல்லையே. ஒரு டம்ளர் தண்ணி மட்டும் குடிச்சுக்கிட்டேன்.

ஓட்டைப் பானைல நண்ட விட்டேன் லொட லொட லொடன்னு ஒரு பாட்டு பி.சுசீலா குரல்ல எம்.எஸ்.வி இசைல பதிவாச்சு. ஆனா அந்தப் படம் வெளிவரலை. அந்தப் பாட்டை நினைவுபடுத்தினேன். அவங்க கிட்ட அந்தப் பாட்டு இல்லாததால அதை மெயில்ல அனுப்பி வைக்கச் சொன்னாங்க. அடுத்த நாளே அனுப்பிட்டேன். முன்னொரு காலத்திலே படத்துக்காக பதிவான அந்தப் பாட்டை நீங்களும் ரசிக்கலாம்.

கூட வந்த முத்தலிப், “தர்பாரி கானடால நீங்க பாடியதுலேயே பிடிச்ச பாட்டு எது”ன்னு கேட்டான். அதுக்குதான் பதில் தெரியலன்னு சொன்னாங்க. ஒவ்வொரு பாட்டையும் விளையாட்டுத்தனமாப் பாடியதாச் சொன்னாங்க. பாட்டுக்குள்ள எறங்கி ஆராய்ச்சிப் பண்றதெல்லாம் ஆராய்ச்சியாளர்கள் வேலை. நாங்கள்ளாம் விளையாட்டுப் போக்குலதான் எல்லாம் செஞ்சோம். அவ்வளவுதான்னு முடிச்சாங்க.

அவங்க சொல்றது உண்மைதான். கலைஞர்கள் அறிவை வைத்துப் படைக்கிறதில்லை. அது ஏதோ அலகிலா விளையாட்டு. அது என்னவோ தனக்குப் புரிஞ்சிட்ட மாதிரி அறிவாளிகள் நெனச்சிக்கலாம். ஆனா கலை அறிவு தொடர்பானது அல்ல. உணர்வு தொடர்பானதுங்குற மெய்ஞானம் என்னைக்காவது அவங்களுக்குப் புரிஞ்சாலும் புரியலாம்.

திருப்பதி பிரம்மோற்சவத்துக்கு சுசீலாம்மாவைப் பாடக் கூப்பிட்டிருக்காங்களாம். அன்னமய்யா கீர்த்தனைகள் பாடப் போறதாச் சொன்னாங்க.

பேசுறதுக்கு இன்னும் எக்கச்சக்கமா இருக்கு. ஆனாலும் ரொம்ப நேரமாயிட்டதால வணக்கம் சொல்லிட்டுப் புறப்பட்டோம். வாசல் வரைக்கும் வந்து வழியனுப்பினாங்க. மறுபடியும் சந்திக்கலாம்னு அவங்க சொன்னப்போ அவ்வளவு மகிழ்ச்சி.

முருகன் நினைச்சா அதுவும் நடக்கும். முருகனருள் சுசீலாம்மாவுக்கு எப்பவும் இருக்கட்டும்.

அன்புடன்,
ஜிரா